Fövqəladə Hallar Nazirliyi (FHN) Lənkəran rayonunda səkkiz nəfərin iştirakı ilə baş verən hadisə barədə məlumat yayıb. Nazirliyin məlumatına görə, vətəndaşlar İstisu qəsəbəsi yaxınlığındakı mürəkkəb relyefli dağlıq-meşəlik ərazidə itkin düşüblər.
Hadisə ilə bağlı məlumat daxil olan kimi, FHN-in Cənub Regional Mərkəzinin xilasediciləri dərhal əraziyə cəlb edilib.
Xilasedicilərin həyata keçirdiyi axtarış-xilasetmə tədbirləri nəticəsində çətin keçilən ərazidə yolunu azmış 8 nəfərin yeri müəyyən edilərək onlar xilas olunublar.
Axtarış əməliyyatında Ekologiya və Təbii Sərvətlər Nazirliyi Meşə Təsərrüfatı Mərkəzinin əməkdaşları və yerli kənd sakinləri də yaxından iştirak ediblər.