İranın həyata keçirdiyi pilotsuz uçuş aparatı hücumlarından biri Küveytin enerji infrastrukturunu hədəf alıb. Hücum nəticəsində ölkənin neft sənayesinə məxsus obyektə ziyan dəyib.
Küveyt rəsmilərinin məlumatına görə, hücum zamanı “Kuwait Oil Company” şirkətinə məxsus dənizdə yerləşən qazma platforması vurulub. Hadisə zamanı platformaya maddi ziyan dəyib, bir işçi isə yaralanıb.
Bəzi regional KİV-lər hücumda İran istehsalı olan “Shahed-136” kamikadze pilotsuz uçuş aparatından istifadə edildiyini iddia etsələr də, bu məlumat hələlik Küveyt rəsmiləri və beynəlxalq nüfuzlu informasiya agentlikləri tərəfindən təsdiqlənməyib.
Hadisə İranla ABŞ arasında davam edən qarşıdurma fonunda baş verib. Tehran eyni vaxtda Küveyt, Qətər, Bəhreyn, Oman və İordaniyada yerləşən ABŞ hərbi obyektlərini raket və pilotsuz uçuş aparatları ilə hədəfə aldığını açıqlayıb.
Region ölkələri isə vəziyyəti yaxından izlədiklərini və enerji obyektlərində təhlükəsizlik tədbirlərinin gücləndirildiyini bildiriblər.