Bakının Binəqədi rayonunun Biləcəri qəsəbəsində qəzalı vəziyyətdə olan dörd yaşayış binasının sökülməsi məsələsi gündəmdədir.
Jnews.az xəbər verir ki, söküntü proqramına daxil edilməsi nəzərdən keçirilən binalar A. Zeynallı küçəsi 35 ünvanındakı 1A saylı bina, A. Zeynallı küçəsi 37 ünvanındakı 2A və 4A saylı binalar, həmçinin M. S. Ordubadi küçəsi 15 ünvanındakı 3 saylı binadır.
Məlumata görə, sözügedən tikililərin qəzalı vəziyyətdə olması onların gələcəkdə söküntü proqramına daxil edilməsini gündəmə gətirib.
Lakin hazırda həmin binaların sökülməsi ilə bağlı yekun qərar qəbul edilməyib.
Binəqədi Rayon İcra Hakimiyyətindən bildirilib ki, qeyd olunan ərazi üzrə müvafiq investisiya təklifləri daxil olduğu və özəl investorların əraziyə maraq göstərdiyi halda məsələ nəzərdən keçirilə bilər.
Qurumun açıqlamasına əsasən, hazırda dövlət tərəfindən həmin ərazidə söküntü işlərinin aparılması nəzərdə tutulmur.
Binaların sökülməsi barədə qərar qəbul ediləcəyi təqdirdə, burada yaşayan sakinlərin mənzillərlə necə təmin olunacağı məsələsi də müəyyənləşdirilməlidir.
Hazırda kompensasiya məbləği ilə bağlı konkret qərar yoxdur. Məlumata görə, əvvəlki illərdə söküntü zamanı bir kvadratmetr üçün təxminən 1 500 manat civarında ödənişlər tətbiq edilsə də, hazırda Bakıda mənzillərin orta bazar qiyməti təxminən 2 700 manat təşkil edir.
Bununla belə, mənzillərin qiyməti ərazidən və digər amillərdən asılı olaraq dəyişir.
Beləliklə, Biləcəridə qeyd olunan dörd binanın sökülməsi hələlik yalnız mümkün variant kimi nəzərdən keçirilir. Söküntünün həyata keçirilməsi üçün isə investor marağı və müvafiq investisiya təkliflərinin olması əsas şərtlərdən biri olacaq.
Mənbə: oxu.az
