Rusiya hakimiyyəti Gürcüstanla müntəzəm hava əlaqəsinin bərpası üzərində işləyir. Bu məlumatı Rusiya Xarici İşlər Nazirliyinin Konsulluq Departamentinin direktor müavini Aleksandr Lambin təsdiqləyib.
Diplomatın sözlərinə görə, uçuşların tam bərpası ilə bağlı yekun qərar Gürcüstandakı vəziyyətdən asılı olacaq.
“Əsas amil Gürcüstan tərəfinin vətəndaşlarımız və təyyarələrimiz üçün lazımi səviyyədə aviasiya təhlükəsizliyini təmin etməyə hazır olmasıdır.”
Daha əvvəl Federasiya Şurasının Beynəlxalq Məsələlər Komitəsinin rəhbəri Qriqori Karasin də bu mövzu ilə bağlı danışmışdı. O bildirmişdi ki, Rusiya “bunun üçün şərait yetişəndə” bu məsələyə qayıda bilər və Gürcüstandakı “çətin daxili siyasi konteksti” qeyd etmişdi.
Xatırladaq ki, Rusiya 2019-cu ilin iyulunda Tbilisidəki anti-Rusiya etirazları fonunda Gürcüstana uçuşları birtərəfli qaydada dayandırmışdı. Qadağa Rusiya Federasiyası Prezidenti Vladimir Putinin 2023-cü il mayın 10-da verdiyi fərmanla ləğv edildi və hava əlaqəsi mayın 19-da bərpa olundu. Hazırda ölkələr arasında uçuşları “Georgian Airways” və Rusiya aviaşirkəti “Azimut” həyata keçirir.