Ukrayna hakimiyyəti bildirib ki, ötən gecə Rusiya tərəfindən Kiyevə qarşı müharibənin başlanmasından bəri ən böyük ballistik raket hücumu həyata keçirilib.
Ukrayna Silahlı Qüvvələrinin Baş Qərargahının məlumatına görə, Rusiya gecə saatlarında Ukrayna ərazisinə genişmiqyaslı kombinə edilmiş hava hücumu təşkil edib. Hücum zamanı ümumilikdə 166 hava hədəfi qeydə alınıb. Bunlardan 41-i raket, 125-i isə pilotsuz uçuş aparatı (PUA) olub. Məlumatda əsas zərbə istiqamətinin Kiyev olduğu qeyd edilib.
Bildirilib ki, hava hücumundan müdafiə qüvvələri, radioelektron mübarizə bölmələri və mobil atəş qruplarının fəaliyyəti nəticəsində 126 hava hədəfi zərərsizləşdirilib. Onlardan 18-i raket, 108-i isə pilotsuz uçuş aparatı olub.
Bununla yanaşı, ilkin məlumatlara əsasən, 23 raket və 10 zərbə tipli pilotsuz uçuş aparatının 20 müxtəlif nöqtəyə düşdüyü qeydə alınıb. Həmçinin vurulan dronların qalıqlarının 18 ərazidə yerə düşdüyü bildirilib.
Hücum nəticəsində Kiyevdə 1 nəfər həlak olub, daha 8 nəfər yaralanıb.
Bundan əlavə, Rusiyaya məxsus pilotsuz uçuş aparatının Zaporojye vilayətində sərnişin qatarına hücum etdiyi bildirilib.
Hadisənin nəticələrinin aradan qaldırılması istiqamətində işlər davam etdirilir.
