İsrail parlamenti (Knesset) növbəti seçkilərin tarixini rəsmən təsdiqləyib və bununla da ölkədə yeni seçki dövrü başlayıb. Parlamentin buraxılması yolunda son hüquqi maneə olan partiyaların maliyyələşdirilməsi haqqında qanun ikinci və üçüncü oxunuşda qəbul edilib. Gecə keçirilən səsvermədə sənədi 62 deputat, o cümlədən Baş nazir Binyamin Netanyahu dəstəkləyib. “The Times of Israel”in məlumatına görə, bundan dərhal sonra seçki prosesinin təqvimi açıqlanıb.
Rəsmi qrafikə əsasən, Knesset iyulun 18-də plenar fəaliyyətini dayandıraraq yay tətilinə çıxıb, iyulun 19-da isə 25-ci çağırış parlamentin səlahiyyətlərinə xitam verilib. Partiya siyahılarının Mərkəzi Seçki Komissiyasına təqdim olunması üçün son tarix 8 sentyabr müəyyən edilib. Parlament seçkiləri isə 27 oktyabrda keçiriləcək və seçicilər 26-cı çağırış Knessetin tərkibini formalaşdıracaqlar.
Knesset sədri Əmir Ohananın sözlərinə görə, parlamentin hazırkı tərkibi müasir İsrail tarixində nadir hadisəyə imza atıb: Knesset 1988-ci ildən bəri ilk dəfə qanunla müəyyən edilmiş dördillik səlahiyyət müddətini tam başa vurub və vaxtından əvvəl buraxılmayıb.
Seçki prosesi cəmiyyətdə fərqli münasibətlər fonunda gedir. “Kursor”un istinad etdiyi son televiziya sorğusuna görə, respondentlərin 67%-i Netanyahu hökumətinin qəbul etdiyi qanunları dəstəkləmir. Sorğuda iştirak edənlərin 23%-i Netanyahunun yenidən hakimiyyətə gələcəyi halda özlərinin və ya yaxınlarının ölkəni tərk edə biləcəyini bildirib. Respondentlərin 68%-i belə addımı istisna edib, 9%-i isə mövqe bildirməyib.