ABŞ-ın Nyu-York şəhərində iki sinaqoqa qarşı həyata keçirilən hücum hüquq-mühafizə orqanlarını hərəkətə keçirib.
Hadisələr nifrət zəminində törədilmiş cinayət kimi araşdırılır.
İyulun 16-da baş verən insidentlər zamanı sinaqoq binalarının üzərinə nəcis və mühərrik yağı töküldüyü bildirilir.
Nyu-York Ştat Assambleyasının üzvü Roziçin verdiyi məlumata görə, hücumlar şəhərin yəhudi icmasında ciddi narahatlıq yaradıb.
Nyu-York Polis Departamenti (NYPD) təsdiqləyib ki, şübhəli şəxs Kvins rayonunda yerləşən pravoslav sinaqoqunun fasadına mühərrik yağı ilə doldurulmuş paket atıb.
Hadisə ilə bağlı araşdırma Nyu-York polisinin nifrət cinayətləri üzrə ixtisaslaşmış xüsusi bölməsi tərəfindən aparılır.
Son aylarda Nyu-Yorkda yəhudi icmasına qarşı yönəlmiş bir sıra oxşar hadisələr də qeydə alınıb. Bunlar arasında Bruklində bir şəxsin bıçaq və beysbol dəyənəyi ilə Xabad sinaqoquna daxil olması, yəhudilərə qarşı planlaşdırıldığı bildirilən terror aktının qarşısının alınması və avtomobilin XABAD-ın mərkəzi sinaqoqunun binasına çırpılması kimi insidentlər yer alır.
Rəsmilər hadisələrin bütün təfərrüatlarının araşdırıldığını və məsul şəxslərin müəyyən edilərək qanun qarşısında cavab verməsi üçün tədbirlərin görüldüyünü bildiriblər.