Çinin Hançjou şəhərində fəaliyyət göstərən fəlakət simulyasiya mərkəzində vətəndaşların tayfun və daşqınlara hazırlığını artırmaq məqsədilə xüsusi təlimlər keçirilir. Layihə ölkədə iqlim dəyişikliyi fonunda ekstremal hava hadisələrinin sayının və intensivliyinin artmasına hazırlıq məqsədi daşıyır.
Təlimlər zamanı iştirakçılar saatda 165 kilometr sürətə çatan küləklər, leysan yağışları və qəfil daşqınlar şəraitini əks etdirən simulyasiyalarda iştirak edirlər. Dağlıq ərazilərdə baş verən sel hadisələrinin canlandırılması üçün yüzlərlə ton sudan istifadə olunur, şəhər mühitində isə su altında qalmış küçələr və digər fövqəladə vəziyyətlər imitasiya edilir.
Mərkəzin məlumatına görə, 2025-ci ilin may ayında fəaliyyətə başladığı vaxtdan indiyədək burada 160 mindən çox insan təlim keçib. Növbəti üç il ərzində ölkənin müxtəlif bölgələrində daha beş oxşar mərkəzin yaradılması planlaşdırılır. Yeni mərkəzlərdə tayfun və daşqınlarla yanaşı, yanğın və zəlzələ kimi digər təbii fəlakətlərin də simulyasiyası keçiriləcək.
Mütəxəssislər bildirirlər ki, iqlim dəyişikliyi Çində dağıdıcı hava hadisələrinin daha tez-tez baş verməsinə səbəb olur. Bu səbəbdən hökumət əhalinin fövqəladə hallara hazırlıq səviyyəsini artırmaq üçün belə təlim mərkəzlərinin şəbəkəsini genişləndirməyi planlaşdırır.