Almaniyanın paytaxtı Berlində keçirilən festival zamanı avtomobilin insanların üzərinə sürülməsi nəticəsində bir nəfər ölüb, 16 nəfər isə müxtəlif dərəcəli bədən xəsarətləri alıb. Yaralılardan bəzilərinin vəziyyətinin ağır olduğu bildirilir.
Berlin polisinin yaydığı məlumata görə, hadisəni törətməkdə şübhəli bilinən şəxs Livan əsilli Almaniya vətəndaşı, 21 yaşlı Abdulla Ballutdur. Hüquq-mühafizə orqanları onun ekstremist islamçı qruplarla əlaqələrinin olduğunu açıqlayıb.
Hazırda şübhəlinin saxlanılması istiqamətində əməliyyatlar davam edir. Polis hadisədə başqa şəxslərin də iştirak etmiş ola biləcəyini istisna etmir. Eyni zamanda, Ballutun yaşadığı ünvanda axtarış aparılıb.
“Bild” qəzetinin məlumatına görə, Abdulla Ballut İŞİD terror təşkilatının tərəfdarıdır. Nəşr yazır ki, o, əvvəllər zorakılıq xarakterli cinayətlərə görə məhkum edilib və 2025-ci ilin may ayına qədər yetkinlik yaşına çatmayanlar üçün nəzərdə tutulmuş islah müəssisəsində saxlanılıb.
Qeyd edək ki, hücum LGBT icmasına dəstək məqsədilə keçirilən illik festival zamanı baş verib. Hadisənin motivi və digər təfərrüatları ilə bağlı istintaq davam edir.
