Rusiyanın Federal Hava Nəqliyyatı Agentliyi (Rosaviasiya) Ukraynanın pilotsuz uçuş aparatları (PUA) ilə həyata keçirdiyi hücumların intensivləşməsi fonunda Moskva hava qovşağında mülki aviasiya üçün əlavə məhdudiyyətlər tətbiq edib.
Rosaviasiyanın hava məkanından istifadəçilər üçün yaydığı NOTAM bildirişinə əsasən, Moskva aeroportları ətrafında mülki təyyarələrin maksimal uçuş hündürlüyü 8500 metrdən 4900 metrə endirilib. Eyni zamanda, paytaxtın hava məkanı üzərindən həyata keçirilən tranzit uçuşlara da qadağa qoyulub.
Aviasiya sahəsindəki mənbələrin bildirdiyinə görə, məhdudiyyətlər Rusiya Müdafiə Nazirliyinin təşəbbüsü ilə tətbiq edilib. Buna səbəb isə son dövrlərdə Ukrayna PUA-larının Moskva istiqamətində həyata keçirdiyi hücumların artmasıdır.
Rosaviasiya tətbiq olunan dəyişiklikləri təsdiqləyib və yeni məhdudiyyətlərin 12 avqusta qədər qüvvədə qalacağını açıqlayıb.