Azərbaycan ərazisindən istifadə etməklə Rusiyadan Ermənistana növbəti tranzit yüklərin çatdırılması davam edir.
“Azərbaycan Dəmir Yolları” QSC-dən verilən məlumata görə, bu gün 14 vaqon propan qazı və 5 vaqon gübrənin tranziti nəzərdə tutulub.
Azərbaycanın logistik imkanlarından istifadə edən tərəflər arasında tranzit yükdaşımalar sistemli xarakter daşıyır. Rəsmi statistikaya əsasən, indiyədək Rusiya tərəfindən Azərbaycanın dəmir yolu şəbəkəsi vasitəsilə Ermənistana aşağıdakı həcmdə yüklər daşınıb:
- Taxıl: 36 000 tondan çox;
- Gübrə: təxminən 8 000 ton;
- Propan: 1 026 ton;
- Antrasit: 414 ton;
- Alüminium: 133 ton;
- Qarabaşaq: 68 ton.
Bununla yanaşı, Azərbaycanın özündən də Ermənistana müəyyən həcmdə yanacaq məhsulları ixrac edilib. Belə ki, indiyədək qonşu ölkəyə 14 000 tondan çox dizel yanacağı, həmçinin təxminən 5 000 ton həcmində AI-92 və AI-95 markalı benzin çatdırılıb.
Qeyd edək ki, Azərbaycan regional nəqliyyat-logistika qovşağı kimi beynəlxalq öhdəliklərinə və tranzit prosedurlarına uyğun olaraq, yükdaşımaların təhlükəsiz və fasiləsiz icrasını təmin edir.