Müdafiə naziri general-polkovnik Zakir Həsənov iyunun 26-da Azərbaycan Prezidentinin Sərəncamı ilə ali hərbi rütbələrə layiq görülmüş hərbi qulluqçularla görüş keçirib. Nazirlikdən verilən məlumata görə, görüş zamanı zabitlərə yeni rütbələr təqdim olunub.
Mərasimdə Azərbaycan Respublikası Prezidentinin hərbi qulluqçulara “general-mayor” ali hərbi rütbəsinin verilməsi haqqında 25 iyun 2026-cı il tarixli Sərəncamı oxunub. Ardınca müdafiə nazirinin müvafiq əmri elan edildikdən sonra rütbələr təqdim edilib.
General-polkovnik Zakir Həsənov Ali Baş Komandanın təbriklərini hərbi qulluqçuların diqqətinə çatdırıb. O, yeni rütbə alan zabitlərə gələcək xidmətlərində uğurlar arzulayıb, öz tapşırıq və tövsiyələrini verib.
Yeni rütbə alan zabitlər isə öz növbəsində onlara göstərilən yüksək etimada görə Azərbaycan Prezidenti, Silahlı Qüvvələrin Ali Baş Komandanı İlham Əliyevə və Müdafiə Nazirliyinin rəhbərliyinə təşəkkürlərini bildiriblər. Onlar bu etimadı doğruldacaqlarına söz veriblər.
