ABŞ-dəki İsrail səfirliyinin sözçüsü “The Times of Israel” nəşrinə bildirib ki, danışıqların üçüncü günü İsrail qoşunlarının geri çəkilməsi məsələsində razılıq əldə edilmədən başa çatıb. Bununla belə, tərəflər müzakirələri davam etdirmək qərarına gəlib və görüşlər cümə günü ABŞ Dövlət Departamentində davam edəcək.
Məlumata görə, danışıqların beşinci raundunun cümə axşamı başa çatacağı və İsrailin cənub Livandakı geniş təhlükəsizlik zonasının müəyyən hissələrindən mərhələli şəkildə geri çəkilməsini nəzərdə tutan çərçivə sazişinin imzalanacağı gözlənilirdi. Plana əsasən, İsrail hərbçilərinin tərk etdiyi mövqeləri Livan Silahlı Qüvvələrinin bölmələri tutmalıdır.
Geri çəkilmənin nəzərdə tutulduğu ərazilər "pilot zonalar" adlandırılır. Lakin İsrail rəsmilərindən biri bu prosesi tam geri çəkilmə kimi qiymətləndirməyin doğru olmadığını bildirib. Onun sözlərinə görə, İsrail ordusu cənub Livanda təxminən altı mil dərinliyində təhlükəsizlik zonasını qoruyub saxlayacaq və yalnız “Hizbullah”ın infrastrukturundan təmizləndiyi bildirilən ərazilərdən çıxacaq.