İsrail və Livan arasında təhlükəsizlik məsələlərinə dair danışıqların altıncı raundu bu gün İtaliyanın paytaxtı Roma şəhərində başlayacaq. İki gün davam edəcək görüşlərdə tərəflər sərhəd bölgəsində sabitliyin təmin olunmasına yönəlmiş əsas məsələləri müzakirə edəcəklər.
Bu barədə “Times of Israel” qəzeti məlumatında qeyd edilir ki, danışıqlar zamanı İsrail ordusunun tədricən çıxacağı ərazilərə Livan Silahlı Qüvvələrinin yerləşdirilməsini nəzərdə tutan sınaq proqramı müzakirə ediləcək. Proqramın əsas məqsədi həmin ərazilərdə silahların və “Hizbullah” qruplaşmasına məxsus hərbi infrastrukturun mövcud olmamasını təmin etməkdir.
Bildirilir ki, bu mexanizm bölgədə təhlükəsizliyin gücləndirilməsi, atəşkəs rejiminin qorunması və sərhəd xəttində gərginliyin yenidən artmasının qarşısının alınması məqsədi daşıyır.
İsrail nümayəndə heyətinə ölkənin Vaşinqtondakı səfiri Yehiel Leyter rəhbərlik edəcək. Danışıqların yekununda tərəflərin əldə olunacaq nəticələr və növbəti addımlarla bağlı birgə qərarlar qəbul edəcəyi gözlənilir.