Yaponiyanın Kumamoto prefekturasında baş verən 7,1 bal gücündə güclü zəlzələ genişmiqyaslı dağıntılara səbəb olub.
Yeraltı təkanlardan təxminən bir saat sonra “Aeon Mall Kumamoto” ticarət mərkəzində güclü partlayış baş verib. Hadisə zamanı binanın ikinci mərtəbəsinin bir hissəsi çöküb və insanların dağıntılar altında qaldığı bildirilir.
İlkin məlumata görə, zəlzələ yerli vaxtla saat 16:27-də qeydə alınıb. Təbii fəlakətdən dərhal sonra ticarət mərkəzində təxliyə işləri başlasa da, partlayış hadisədən təxminən bir saat sonra baş verib. Hadisə şahidləri güclü partlayış səsi eşitdiklərini, daha sonra isə binadan qalın tüstünün yüksəldiyini bildiriblər. Partlayışın səbəbi hələ rəsmi açıqlanmasa da, ilkin ehtimallara görə, hadisə qaz sızması ilə əlaqəli ola bilər.
Yaponiya hökuməti bölgəyə minlərlə xilasedici və hərbçi cəlb edib. Xilasetmə əməliyyatları davam edir, dağıntılar altında qalan şəxslərin axtarışı aparılır. Rəsmi qurumlar ölən və yaralananların dəqiq sayını hələ açıqlamayıb. Eyni zamanda, on minlərlə ev işıqsız qalıb, yollar zədələnib, dəmir yolu və hava nəqliyyatında ciddi fasilələr yaranıb.
Zəlzələdən sonra elan edilən sunami xəbərdarlığı isə sonradan ləğv edilib.