İsrailin ABŞ tərəfinə ötürdüyü kəşfiyyat məlumatlarından sonra Ağ Ev prezident Donald Tramp və administrasiyasının bir sıra yüksək vəzifəli rəsmilərinin mühafizəsini gücləndirib.
İsrail mediasında yer alan iddialara görə, kəşfiyyat məlumatlarında İranın Trampa qarşı mümkün hücum planı hazırladığı ehtimalının yer aldığı bildirilir.
Donald Trampın Türkiyəyə son səfəri zamanı ona Tehranda ABŞ prezidentinə qarşı birbaşa təhlükə yarada biləcək yeni planın müzakirə edildiyinə dair kəşfiyyat məlumatı təqdim olunub. Həmin məlumat tam təsdiqlənməsə də, təhlükəsizlik orqanları onu kifayət qədər ciddi qiymətləndirərək əlavə mühafizə tədbirlərinin görülməsinə qərar veriblər.
Təhlükə ilə bağlı xəbərdarlıqlar Trampın bir neçə yüksək vəzifəli müşavirinə də çatdırılıb. Onlara mümkün sui-qəsd riskinə görə şəxsi avtomobillərdən və bəzi nəqliyyat xidmətlərindən istifadə etməmək tövsiyə olunub.
Təhlükəsizlik tədbirləri Trampın Türkiyədən ABŞ-yə qayıdışına da təsir edib. Prezidentin uçuşu üçün daha köhnə “Air Force One” təyyarəsindən istifadə olunub. Bildirilir ki, buna səbəb Qətərin Trampa təqdim etdiyi dəbdəbəli təyyarənin mühafizə sisteminin etibarlılığı ilə bağlı yaranan şübhələr olub.
Sonradan uçuş planında edilən dəyişikliklərin səbəblərinin mediaya sızması Ağ Evdə narahatlıq yaradıb. Donald Tramp bunu təhlükəsizlik qaydalarının pozulması kimi qiymətləndirərək məlumat sızmasının mənbəyinin müəyyənləşdirilməsini tələb edib.
Hazırda Ağ Evdə daxili araşdırma aparılır. Araşdırma çərçivəsində administrasiyanın bir sıra əməkdaşlarından mobil telefonlarını təqdim etmələri istənilib. Məqsəd prezidentin təhlükəsizliyi ilə bağlı məxfi məlumatların administrasiyadan kənara necə sızdığını müəyyən etməkdir.