ABŞ rəsmilərinin bildirdiyinə görə, ABŞ ordusu çərşənbə axşamı İslam İnqilabı Keşikçiləri Korpusunun (SEPAH) obyektlərinə zərbə endirmək üçün B-1 uzaqmənzilli bombardmançı təyyarəsindən istifadə edib.
Bu, 12 gün əvvəl İranla döyüşlərin yenidən başlamasından sonra ABŞ-ın ilk B-1 missiyası olub.
B-1 bombardmançılar təxminən 900 kq ağırlıqda bomba və qanadlı raketlər daşıya bilir.
Baş verənlər ABŞ-ın hərbi kampaniyasının əhəmiyyətli dərəcədə genişləndirildiyini və eskalasiyanın artdığını göstərir.
B-1 bombardmançıları aşağı hündürlükdə səs sürətindən daha yüksək sürətlə uça bilir və digər bombardmançı növləri arasında ən böyük bomba yükünü daşımaq imkanına malikdir.
B-1 bombardmançısı missiyaya Böyük Britaniyadakı aviabazadan başlayıb və onun uçuşu onlayn təyyarə izləmə saytlarında müşahidə edilib.
ABŞ Mərkəzi Komandanlığı (CENTCOM) çərşənbə axşamı həyata keçirilən zərbələrlə bağlı açıqlamasında B-1 missiyasını ayrıca qeyd etməyib.
CENTCOM-un açıqlamasında deyilir: CENTCOM qüvvələri İranın hərbi əməliyyat mərkəzlərini, dəniz imkanlarını, təyyarə anqarlarını, dron saxlama obyektlərini və hərbi logistika infrastrukturunu hədəfə alıb. Məqsəd İranın Hörmüz boğazında kommersiya gəmilərinə təhlükə yaratmaq imkanlarını daha da azaltmaqdır.
B-1 bombardmançısının konkret hansı obyektlərə zərbə endirdiyi və bu genişmiqyaslı əməliyyatın son günlərdə həyata keçirilən digər zərbələrdən daha effektiv olub-olmadığı məlum deyil.
ABŞ daha əvvəl “Epic Fury” əməliyyatı çərçivəsində bir neçə B-1 missiyası həyata keçirib. Bu zərbələr zamanı raket bazaları, komanda mərkəzləri, silah anbarları və hava hücumundan müdafiə sistemləri hədəfə alınıb.
ABŞ-ın zərbələri genişləndirməsinə baxmayaraq, İran hakimiyyəti Hörmüz boğazı ilə bağlı mövqeyini dəyişmiş kimi görünmür. Tehran regiondakı ABŞ bazalarına qarşı hücumlarını da davam etdirir.