İsrail Səhiyyə Nazirliyi ölkənin bütün xəstəxanalarında xarici süni intellekt (Aİ) xidmətlərinə çıxışı məhdudlaşdırıb. Qərar milli səhiyyə sisteminin kibertəhlükəsizliyini gücləndirmək və həssas tibbi məlumatların mümkün sızmasının qarşısını almaq məqsədi daşıyır.
Məhdudiyyət bu ilin mart ayında, “Şir nəriltisi” əməliyyatı dövründə səhiyyə infrastrukturuna qarşı kiberhücumların artmasından sonra tətbiq edilib. Buna baxmayaraq, bəzi tibb işçilərinin şəxsi smartfon və noutbuklardan istifadə edərək süni intellekt platformalarına daxil olmağa davam etdiyi bildirilir.
Həkimlər qeyd edirlər ki, süni intellekt artıq gündəlik iş prosesinin vacib hissəsinə çevrilib. Bu texnologiya epikrizlərin hazırlanması, tibbi və elmi mətnlərin tərcüməsi, araşdırmaların xülasəsinin hazırlanması, təqdimatların və qrant müraciətlərinin tərtib edilməsi kimi inzibati işləri əhəmiyyətli dərəcədə sürətləndirir. Mütəxəssislərin fikrincə, bu alətlər rutin işlərə sərf olunan vaxtı azaldaraq həkimlərin daha səmərəli fəaliyyət göstərməsinə imkan yaradır. Bununla yanaşı, əksər həkimlər açıq süni intellekt sistemlərindən klinik diaqnoz qoymaq üçün istifadə etmədiklərini vurğulayırlar.
Ekspertlər hesab edirlər ki, tam bloklama məlumat təhlükəsizliyi ilə bağlı riskləri aradan qaldırmır. Onların fikrincə, qadağa bəzi hallarda istifadəni nəzarətdən kənar şəxsi cihazlara yönləndirərək risklərin daha çətin izlənməsinə səbəb ola bilər.
Texnion Universitetinin tibb fakültəsinin professoru və “Rambam” Tibb Mərkəzinin Nevrologiya şöbəsinin rəhbəri professor Şahar Şeli bildirib ki, korporativ şəbəkələrdə tətbiq edilən bloklama xarici kiberhücumlara qarşı müdafiəni gücləndirsə də, məxfi məlumatların sızması problemini tam həll etmir. Onun sözlərinə görə, həkim pasiyent məlumatlarını şəxsi smartfon vasitəsilə süni intellekt sisteminə ötürdükdə, bu məlumatlar artıq tibb müəssisəsinin nəzarət edə bilmədiyi kanallar üzərindən ötürülmüş olur.
Professor Şeli hesab edir ki, sərt qadağalar əvəzinə, Səhiyyə Nazirliyi süni intellektdən istifadəyə dair aydın hüquqi və texniki standartlar hazırlamalı, eləcə də hansı kateqoriyadan olan tibbi məlumatların bu sistemlərə ötürülməsinin mümkün olduğunu dəqiq müəyyənləşdirməlidir. Bu yanaşmanın həm innovasiyaların tətbiqinə, həm də məlumat təhlükəsizliyinin qorunmasına daha effektiv xidmət edəcəyi vurğulanır.