İsrailin müdafiə naziri İsrael Kats, Baş Qərargah rəisi, general-leytenant Eyal Zamirin təqdimatı əsasında orduda yüksək vəzifələrə yeni təyinatları təsdiqləyib.
Yeni təyinatlar siyahısına 18 briqada generalı və bir polkovnik daxildir. Bundan başqa, 9 briqada generalı yeni vəzifələrə təyin edilib.
Ən diqqətçəkən təyinatlardan biri “Gimel” kod adı ilə tanınan qadın pilotla bağlıdır. Hazırda Ovda Hərbi Hava Bazasının komandiri olan “Gimel” rütbəsi artırıldıqdan sonra İsrail Hərbi Hava Qüvvələrinin ABŞ-dakı yeni nümayəndəsi vəzifəsini icra edəcək.
42 yaşlı zabit bu təyinatdan sonra İsrail Hərbi Hava Qüvvələrinin tarixində general rütbəsi alan ilk qadın pilot və bu qoşun növündə ən yüksək rütbəyə malik qadın hərbçi olacaq.