Yenilənib: Avqust 14, 2026 3:03 axşam
Azərbaycanın Samux rayonunun Alıuşağı kəndində qarayara ilə bağlı xüsusi nəzarət postu quraşdırılıb.
Avtomobillərin hərəkəti tam açıq saxlanılır. Postda əsasən kənd ərazisindən ət və süd məhsullarının daşınmasına nəzarət edilir.
Burada Azərbaycan Qida Təhlükəsizliyi Agentliyinin və baytarlıq xidmətinin əməkdaşları fəaliyyət göstərir. Kənddən çıxan avtomobillər dezinfeksiya edilir. Bundan əlavə, kənddəki iri təsərrüfatlarda dezinfeksiya baryerləri yaradılıb.
Qeyd edək ki, avqustun 13-də Abbas Səhhət adına Gəncə Birləşmiş Xəstəxanasının Yoluxucu xəstəliklər şöbəsinə qarayara infeksiyasına şübhəli bilinən 11 nəfər yerləşdirilib. Onların bir çoxunun Samux rayonunun Alıuşağı kəndinin sakinləri olduğu bildirilir.
Hazırda kənddə epidemioloji təhlükəsizliyin təmin edilməsi və mümkün yoluxma hallarının qarşısının alınması istiqamətində müvafiq tədbirlər həyata keçirilir.
Mənbə: Teleqraf.az
