Ermənistanın “Hraparak” nəşri Rusiyanın ölkəyə qarşı yeni iqtisadi məhdudiyyətlər tətbiq edə biləcəyi barədə məlumat yayıb.
Nəşrin iddiasına görə, bu məsələ Ermənistan hökumətinə yaxın dairələrdə Avropa Komissiyasının sədri Ursula fon der Lyayenin İrəvana səfəri fonunda müzakirə olunur.
Məlumata əsasən, iyulun 1-2-də baş tutacaq səfər çərçivəsində Ursula fon der Lyayenlə yanaşı, Marta Kos da Ermənistana gələcək. Nəşr bu səfəri parlament seçkilərindən sonra Ermənistan hakimiyyətinə göstərilən siyasi dəstəyin nümayişi kimi qiymətləndirir.
“Hraparak” qeyd edir ki, Moskva əvvəllər də İrəvanın Qərblə yaxınlaşmasına ixrac məhdudiyyətləri və digər iqtisadi addımlarla reaksiya verib. Ermənistanın Avropa strukturları ilə əməkdaşlığının daha da dərinləşməsi halında Rusiya ikinci iri sanksiyalar paketini tətbiq edə bilər.
Məqalədə vurğulanır ki, mümkün sanksiyalar ilk növbədə Ermənistanın biznes sektoruna və ümumi iqtisadiyyatına mənfi təsir göstərəcək. Rusiya tərəfi isə bununla bağlı hələlik rəsmi açıqlama verməyib.