İsrail Müdafiə Ordusu (SAXAL) bu gün verdiyi açıqlamada Qəzza zolağının cənubunda “İslami Cihad”ın Xan Yunis briqadasının “Nuhba” xüsusi təyinatlı dəstəsinin komandiri Zəki Yusif Mahmud Əbu Mustafanın məhv edildiyini bildirib.
SAXAL həmçinin HƏMAS-ın “Nuhba” bölməsinin üzvü Məhəmməd Üsamə Əbd əl-Əzizin də zərərsizləşdirildiyini qeyd edib.
SAXAL-ın mətbuat xidmətindən verilən məlumata görə, Əbu Mustafa Qəzza zolağının cənubuna endirilən hava zərbəsi nəticəsində öldürülüb. Həmçinin, yeni döyüşçülərin cəlb edilməsi ilə məşğul olan HƏMAS-ın “Nuhba” bölməsinin üzvü Məhəmməd Üsamə Əbd əl-Əziz də eyni əməliyyat çərçivəsində zərərsizləşdirilib.
Əbu Mustafanın fəaliyyəti
İsrail ordusu bildirib ki, “İslami Cihad”ın “Nuhba” xüsusi təyinatlı dəstəsinin məhv edilən komandiri Zəki Yusif Mahmud Əbu Mustafa 2023-cü il oktyabrın 7-də Nir-Oz kibutsuna edilən hücumda və bir İsrail vətəndaşının qaçırılmasında birbaşa iştirak edib. Onun fəaliyyəti təşkilatın hərbi imkanlarının bərpasında mühüm rol oynayıb.
SAXAL-ın açıqlamasında qeyd olunub: “Son aylarda Əbu Mustafa Qəzza zolağında terror təşkilatının hərbi potensialının bərpasında mühüm rol oynayıb ki, bu da atəşkəs razılaşmasının pozulması deməkdir. Onun son fəaliyyəti və SAXAL üçün yaratdığı birbaşa təhlükə nəzərə alınaraq, Əbu Mustafa dəqiq zərbə nəticəsində məhv edilib”.
Məhəmməd Üsamə Əbd əl-Əzizin isə HƏMAS-ın “Nuhba” bölməsində yeni üzvlərin cəlb edilməsi prosesində aktiv iştirak etdiyi bildirilir.