Azərbaycan və Seneqal vətəndaşların qarşılıqlı səfərlərini sadələşdirmək və turizm əlaqələrini inkişaf etdirmək məqsədilə ikitərəfli saziş imzalamağı planlaşdırır.
Seneqalın Türkiyə, Azərbaycan, Türkmənistan və Gürcüstandakı səfiri Mustafa Sohna Diopun sözlərinə görə, təşəbbüs Azərbaycanın İxracın və İnvestisiyaların Təşviqi Agentliyinin (AZPROMO) rəhbərliyi ilə keçirilən son onlayn görüş zamanı müzakirə olunub.
Diplomat bildirib ki, tərəflər Azərbaycan və Seneqal vətəndaşları üçün vizasız və ya sadələşdirilmiş gediş-gəliş imkanlarının yaradılmasını nəzərdə tutan ikitərəfli saziş üzərində işləməyi planlaşdırırlar.
Onun sözlərinə görə, əsas məqsəd iki ölkə arasında səfərləri asanlaşdırmaq, azərbaycanlıların Seneqala, seneqallıların isə Azərbaycana səfərlərini təşviq etmək və qarşılıqlı turizm mübadiləsini genişləndirməkdir.
Sazişin imzalanması iki ölkə arasında turizm əlaqələrinin inkişafına və qarşılıqlı səfərlərin artmasına imkan yarada bilər.
Mənbə: report.az
