Böyük Təl-Əviv metrosunun tikintisində mühüm mərhələ başlayır. Gələn ay M2 metro xətti üzrə ilk tunelin qazılması işlərinə start veriləcək.
İlk mərhələdə təxminən 35 metr dərinliyində – 12 mərtəbəli binanın hündürlüyünə bərabər xüsusi şaxta qazılacaq. Daha sonra bu şaxtaya tunellərin qazılması üçün nəzərdə tutulan nəhəng tunelqazan maşın (TBM) endiriləcək və yeraltı tunelin inşasına başlanacaq. Layihə çərçivəsində ümumilikdə 24 belə maşının fəaliyyət göstərəcəyi planlaşdırılır.
Uzunluğu 26 kilometr olacaq M2 metro xəttində 22 stansiya inşa ediləcək. Yeni marşrut Petah-Tikva, Givat Şmuel, Bney-Brak, Givataim, Təl-Əviv və Holon şəhərlərini birləşdirəcək. Hesablamalara görə, xəttdən hər gün 500 mindən çox sərnişin istifadə edəcək.
M2 xətti Bar-İlan Universiteti, “Ha-Şalom” dəmiryolu stansiyası, İsrail Müdafiə Nazirliyinin qərargahı, Habima meydanı, Karmel bazarı və Volfson Tibb Mərkəzi kimi ölkənin mühüm nəqliyyat və ictimai obyektlərini əhatə edəcək.
İlk tikinti işləri Petah-Tikvadakı Kfar Qanim rayonunda aparılacaq.
NTA şirkətinin M2 xətti üzrə layihə rəhbəri Adi Kain Karni bildirib ki, ilk tikinti şaxtasının inşasına başlanması layihənin həyata keçirilməsində mühüm dönüş nöqtəsidir. Onun sözlərinə görə, yeni metro sistemi İsraildə ictimai nəqliyyatı daha sürətli, rahat və səmərəli edəcək, milyonlarla insanın gündəlik həyatını əhəmiyyətli dərəcədə asanlaşdıracaq.