Bakının Nərimanov rayonunda fəaliyyət göstərən marketlərdən birindən ümumi dəyəri 5 min manat olan spirtli içkilər və tütün məmulatları oğurlanıb. Daxili İşlər Nazirliyi hadisəylə bağlı məlumat yayaraq şübhəlinin saxlanıldığını açıqlayıb.
Şübhəli müxtəlif vaxtlarda marketə girərək oğurluq edib
Nərimanov Rayon Polis İdarəsinin 17-ci Polis Şöbəsinin əməkdaşları keçirdikləri əməliyyat-axtarış tədbirləri çərçivəsində oğurluqda şübhəli bilinən 32 yaşlı Ə. Əlfəddinzadəni saxlayıblar. Aparılan araşdırmalar nəticəsində müəyyənləşdirilib ki, şübhəli şəxs həmin obyektə müxtəlif vaxtlarda daxil olaraq malları dəfələrlə oğurlayıb.
İş davam edir
Daxili İşlər Nazirliyinin məlumatına görə, faktla bağlı araşdırmalar hazırda davam etdirilir.