Hörmüz boğazında təhlükəsizlik vəziyyəti yenidən gərginləşib. Oman sahilləri yaxınlığında Sinqapur bayrağı altında üzən yük gəmisinin pilotsuz uçuş aparatı ilə vurulmasından sonra BMT-nin Beynəlxalq Dəniz Təşkilatı (IMO) bölgədə həyata keçirdiyi gəmilərin təxliyəsi əməliyyatını müvəqqəti dayandırıb.
ABŞ rəsmilərinin məlumatına görə, hücumun İran İslam İnqilabı Keşikçiləri Korpusunun (SEPAH) kamikadze dronu ilə həyata keçirildiyi ehtimal edilir. Hadisə nəticəsində gəminin idarəetmə hissəsinə ziyan dəyib, lakin ekipaj üzvləri arasında itki qeydə alınmayıb. Rəsmi Tehran isə hücumla bağlı məsuliyyəti üzərinə götürməyib.
İnsident ABŞ və İran arasında Hörmüz boğazında gəmiçiliyin bərpasına dair əldə olunmuş müvəqqəti razılaşmadan sonra baş verən ilk ciddi təhlükəsizlik hadisəsi kimi qiymətləndirilir. Hücumdan əvvəl İran yalnız Tehranın müəyyən etdiyi marşrutlardan istifadə olunması barədə xəbərdarlıq etmişdi.
BMT-nin Beynəlxalq Dəniz Təşkilatı bildirib ki, hücumdan sonra təhlükəsizlik zəmanətlərinin yenidən qiymətləndirilməsi məqsədilə təxliyə əməliyyatı dayandırılıb. Qurum vurğulayıb ki, hücuma məruz qalan gəmi IMO-nun rəsmi təxliyə marşrutu ilə hərəkət etməyib.