İsrail polisi Fələstin ərazilərindən ölkə ərazisinə doğru qazılmış yeraltı tunel aşkarlayıb. Məlumatı İsrail polisinin mətbuat xidməti yayıb. Tunel Əz-Zayim keçid məntəqəsinin yaxınlığında yerləşir və təxminən 25 metr dərinlikdədir.
Hadisə yerinə dərhal təhlükəsizlik qüvvələri cəlb edilib. Keçirilən əməliyyat zamanı tuneldən qazıntı alətləri və müxtəlif avadanlıqlar aşkar edilərək götürülüb.
Araşdırma zamanı kriminalistlər tərəfindən götürülən DNT nümunələri əsasında iki şübhəli şəxsin kimliyi müəyyən edilib. Onlardan biri Əl-Eyzariyyə sakini olan fələstinli, digəri isə Şərqi Qüdsdə yaşayan təxminən 30 yaşlı şəxsdir.
Hər iki şübhəli saxlanılıb və dindirilmələri üçün aidiyyəti orqanlara təhvil verilib.
İstintaqın ilkin versiyasına görə, tunelin terror fəaliyyəti həyata keçirmək və ya İsrail ərazisinə qanunsuz daxil olmaq məqsədilə qazıldığı ehtimal olunur. Faktla bağlı araşdırmalar davam etdirilir.