İsrailin Baş ravvini David Yosefin təşəbbüsü ilə Baş Ravvinatın qərargahında qadınlara qarşı nifrət halları və Efiopiya yəhudi icması arasında genişlənən missioner fəaliyyətinin müzakirəsinə həsr olunmuş iclas keçirilib.
İsrailin Dini İşlər Nazirliyinin yaydığı məlumata görə, toplantıda Efiopiya yəhudilərinin baş ravvini Reuven Vabşet, tanınmış ravvinlər, keşimlər (Efiopiya yəhudilərinin dini liderləri) və icmanın sosial işçiləri iştirak ediblər.
İclas zamanı Baş ravvinə mövcud vəziyyətlə bağlı ətraflı hesabat təqdim olunub. Bildirilib ki, son dövrlərdə əvvəllər gizli şəkildə fəaliyyət göstərən missioner qruplar artıq açıq şəkildə icma üzvlərinə təsir göstərməyə çalışırlar. Onların əsas məqsədinin Efiopiya yəhudilərini yəhudilikdən uzaqlaşdırmaq, dini kimliyi zəiflətmək və ənənəvi ailə dəyərlərini sarsıtmaq olduğu vurğulanıb.
İştirakçılar həmçinin qadınlara qarşı nifrət və ayrı-seçkilik hallarının qarşısının alınması istiqamətində görüləcək işləri də müzakirə ediblər.
Görüşdə dini maarifləndirmə, təhsil proqramlarının genişləndirilməsi, sosial dəstəyin gücləndirilməsi və ailə institutunun qorunmasına yönəlmiş kompleks tədbirlərin həyata keçirilməsinin vacibliyi qeyd edilib.
Baş ravvin David Yosef bildirib ki, İsrailin Baş Ravvinatı yəhudi kimliyinin, dini dəyərlərin və ailə institutunun qorunması üçün genişmiqyaslı fəaliyyətə rəhbərlik edəcək. Onun sözlərinə görə, missioner fəaliyyətinin qarşısının alınması və cəmiyyət daxilində həmrəyliyin möhkəmləndirilməsi prioritet məsələlərdən biridir.
Rəsmi dairələr hesab edirlər ki, dini və ictimai institutların birgə fəaliyyəti həm missioner təsirlərinin qarşısının alınmasına, həm də yəhudi icmalarında sosial sabitliyin və ailə dəyərlərinin qorunmasına mühüm töhfə verəcək.