London polisi bazar günü Edqvar bölgəsində sinaqoq yaxınlığında baş verən iğtişaşlardan sonra kütləvi həbslər barədə məlumat verib. Hadisə Fələstin tərəfdarı nümayişçilərin daşınmaz əmlak obyektlərinin təqdimatını pozmaq cəhdi ilə bağlıdır.
Fələstin və İsrail bayraqları daşıyan fəallar arasında şiddətli toqquşmaların videogörüntüləri sosial şəbəkələrdə yayılıb. Hüquq-mühafizə orqanlarının məlumatına görə, sinaqoq yaxınlığında hər iki tərəfdən 1000-ə yaxın insan toplaşıb.
“Edqvarda sinaqoqda bu günkü tədbirlə əlaqədar polisin iştirakı gücləndirilib… Əməliyyat zamanı 14 nəfər saxlanılıb.”
Etirazçılar təqdimatın təşkilatçılarını İordan çayının qərb sahilindəki İsrail yaşayış məntəqələrində torpaq sahələrinin satışını təşviq etməkdə günahlandırıblar. Təşkilatçılar bu ittihamları rədd ediblər.
Bundan əvvəl London polisi yəhudi icmasının obyektlərinə qarşı bir sıra yandırma və hücumlardan sonra 26 şübhəlini saxlamışdı. May ayında 10 000-ə yaxın insan Downing Street-ə çıxaraq, yəhudi icmalarının hücumlardan qorunmasının gücləndirilməsini tələb etmişdi. Aprel ayında isə Londonun mərkəzində qadağan olunmuş Fələstin Hərəkatı Palestine Action-ı dəstəkləyən aksiyanın 92 iştirakçısı saxlanılmışdı.