Kapitala dair tələblərin artırılması Azərbaycan banklarının dayanıqlılığının möhkəmlənməsinə təkan verib. Bu barədə “Moody’s” beynəlxalq reytinq agentliyinin yeni hesabatında bildirilir. Ekspertlər sektorun potensial iqtisadi risklərə qarşı dayanıqlılığının artdığını təsdiqləyiblər.
Agentliyin məlumatına görə, ölkədə “Basel III” standartları çərçivəsində artıq yeni kapital buferləri tətbiq olunub. Bu tələblərə tam uyğunluğun 2027-ci ildə təmin ediləcəyi gözlənilir.
Analitiklər qeyd edirlər ki, normativ bazanın beynəlxalq standartlara uyğunlaşdırılması və riskəsaslı nəzarətin tətbiqi sayəsində bank sektorunun tənzimlənməsi güclənir.
Bu dəyişikliklər kredit baxımından müsbətdir, çünki kredit portfellərinin keyfiyyətinin yaxşılaşmasına, bankların zərərləri örtmək qabiliyyətinin artmasına və sistem risklərinin tədricən azalmasına kömək edir.
Sənəddə vurğulanır ki, tənzimləyici islahatlar prudensial tələblərin sərtləşdirilməsinə və risklərin idarə edilməsi sisteminin təkmilləşdirilməsinə gətirib çıxarıb. Qəbul edilmiş tədbirlərə kapital buferlərinin artırılması, aktivlərin daha mühafizəkar təsnifatı, ehtimal olunan kredit itkiləri üzrə ehtiyatların gücləndirilməsi və likvidliyin idarə olunmasının yaxşılaşdırılması daxildir.
“Moody’s”-in qiymətləndirmələrinə görə, kapitala dair tələblərin artırılması Azərbaycan (reytinq Baa3, proqnoz «müsbət») və Qazaxıstan banklarının ödəniş qabiliyyətini möhkəmləndirib. Nəzarətin gücləndirilməsi zərərlərin vaxtında tanınmaması hallarını azaltmağa imkan verib, tənzimləyicilərin fəaliyyəti isə daha proaktiv xarakter alıb.
Agentliyin proqnozlarına əsasən, region ölkələrinin hökumətləri maliyyə sabitliyinə, şəffaflığa və şərti öhdəliklərin məhdudlaşdırılmasına xüsusi diqqət yetirərək prudensial standartları möhkəmləndirməyə davam edəcəklər. Bununla belə, islahatların tempi və effektivliyi dövlət təsisatlarının keyfiyyətindən, bank nəzarəti orqanlarının müstəqilliyindən və bazar iqtisadiyyatının inkişafına sadiqlikdən asılı olacaq.
Mənbə: Jnews.az