İsrailin paytaxtı Yerusəlimin Davud rayonunda aparılan arxeoloji qazıntılar zamanı Birinci Məbədin dağıdıldığı dövrə aid yanmış taxta tirlər aşkar edilib.
Tapıntı Givati dayanacağı ərazisində İsrail Antik Əşyalar İdarəsi və Tel-Əviv Universitetinin birgə apardığı qazıntılar zamanı üzə çıxıb.
Mütəxəssislərin fikrincə, iri ölçülü taxta hissələr qədim binanın tavan konstruksiyasına aid olub. Güclü yanğın nəticəsində bina dağılıb, taxtalar isə yerə çöküb. Divarlardan qopan və əriyən suvaq onların üzərini örtərək təxminən 2600 il ərzində qorunmasını təmin edib.
Arxeoloq Yohanna Regev bildirib ki, İsraildə bu qədər qədim və bu dərəcədə yaxşı qorunmuş ağac nümunələrinə çox nadir hallarda rast gəlinir. Onun sözlərinə görə, tapılan taxtalar alimlərə hadisələrin tarixini daha dəqiq müəyyənləşdirməyə imkan verəcək.
Qazıntı rəhbərləri İftah Şalev və professor Yuval Qadot hesab edirlər ki, tapıntı eramızdan əvvəl 586-cı ildə Yerusəlimin böyük dağıntıya məruz qalmasını təsdiqləyən mühüm sübutlardan biridir. Onların fikrincə, ərazidə yerləşən iri tikili qəsdən yandırılıb və demək olar ki, tamamilə məhv edilib.
Alimlər bildirirlər ki, sonrakı dövrlərdə insanlar dağıntıların yaxınlığında yaşamağa davam etsələr də, həmin ərazini keçmiş faciənin yadigarı kimi qoruyub saxlayıblar.
