İsrail parlamenti (Knesset) kiçik və orta sahibkarlıq subyektləri haqqında kredit məlumatlarının toplanacağı yeni məlumat bazasının yaradılmasını nəzərdə tutan qanunu təsdiqləyib.
Yeni sistem kredit verən qurumlarla sahibkarlar arasında mövcud olan informasiya asimmetriyasını azaltmağa, kredit bazarında rəqabəti gücləndirməyə və bizneslərin maliyyə resurslarına çıxışını asanlaşdırmağa xidmət edəcək.
Maliyyə Nazirliyinin hesablamalarına əsasən, yeni kredit məlumat bazası kiçik və orta bizneslərə ildə ən azı 1,5 milyard şekel qənaət etməyə imkan verəcək. Həmçinin, biznes kreditləri üzrə faiz dərəcələrinin ən azı 1 faiz bəndi azalacağı gözlənilir.
Hazırda İsraildə bir çox kiçik biznes yalnız hesabının olduğu bankdan kredit ala bilir. Yeni sistem isə digər banklara və kredit verən maliyyə qurumlarına da müəssisələrin maliyyə vəziyyətini qiymətləndirmək imkanı yaradacaq. Bu isə sahibkarların daha sərfəli şərtlərlə kredit əldə etməsinə şərait yaradacaq.
Qeyd edək ki, bu təşəbbüs 2019-cu ildə fiziki şəxslər üçün yaradılmış kredit məlumat bazasının uğurlu nəticələrindən sonra gündəmə gəlib. Həmin sistem İsraildə istehlak kreditləri bazarında rəqabətin artmasına səbəb olub. Nəticədə bankların istehlak kreditləri bazarındakı payı 2020-ci ildə təxminən 88 faizdən 2023-cü ildə 79 faizə enib. Eyni dövrdə bank olmayan kredit təşkilatlarının və kredit kartı şirkətlərinin bazar payı artıb.