Ukrayna ordusu iyulun 24-nə keçən gecə Rusiyanın Sankt-Peterburq şəhəri və Leninqrad vilayətinə pilotsuz uçuş aparatları (PUA) ilə hücum edib. Hücum zamanı Rusiyanın ən böyük onlayn ticarət platformalarından biri olan “Wildberries” şirkətinin iki logistika mərkəzinə zərbə endirilib.
Məlumata görə, anbarlarda yanğın baş verib və təhlükəsizlik məqsədilə hər iki logistika mərkəzinin fəaliyyəti müvəqqəti dayandırılıb. Rusiya rəsmiləri hava hücumundan müdafiə qüvvələrinin bir neçə dronu məhv etdiyini bildirsələr də, hücum nəticəsində mülki infrastruktura ziyan dəydiyini təsdiqləyiblər. Hadisə ilə əlaqədar Sankt-Peterburqdakı “Pulkovo” hava limanında da bir sıra reyslər gecikib.
Ukrayna tərəfi hücumla bağlı hələlik rəsmi açıqlama verməyib. Bununla belə, rəsmi Kiyev daha əvvəl “Wildberries”in bəzi logistika obyektlərinin Rusiya ordusunun təchizatında istifadə olunduğunu iddia edib. Moskva isə bu iddiaları rədd edərək anbarların mülki təyinatlı obyektlər olduğunu bildirir.