Ermənistanın Baş naziri Nikol Paşinyan sentyabrın 1-də Bişkekdə keçirilən “ŞƏT plus” formatında görüşdə Azərbaycan və Türkiyə ilə münasibətlərin normallaşdırılması prosesindən danışıb.
Jnews.az xəbər verir ki, Paşinyanın sözlərinə görə, Ermənistan qonşu ölkələrlə dövlətlərarası əlaqələrin qurulması və nəqliyyat kommunikasiyalarının açılması istiqamətində fəal iş aparır.
Baş nazir bildirib ki, danışıqlar prosesi ötən il avqustun 8-də Ermənistanla Azərbaycan arasında sülh sazişi mətninin paraflanmasından sonra yeni impuls əldə edib. Onun sözlərinə görə, bu proses ABŞ Prezidenti Donald Trampın dəstəyi və iştirakı ilə həyata keçirilib.
TRIPP layihəsi nəqliyyat əlaqələrinin açılmasında əsas vasitə olacaq
Paşinyanın sözlərinə görə, nəqliyyat yollarının açılmasında əsas vasitələrdən biri TRIPP layihəsi olacaq.
“Onun praktiki icrası ilə bağlı işlər yaxın aylarda yerlərdə başlayacaq”, – deyə Ermənistanın Baş naziri bildirib.
Paşinyan qeyd edib ki, layihə həm Xəzər dənizi ilə Aralıq dənizini birləşdirən Şərq-Qərb istiqamətində, həm də Fars körfəzi ilə Qara dənizi birləşdirən Şimal-Cənub istiqamətində yeni imkanlar yaradacaq.
Paşinyan İran və Gürcüstanla əlaqələrin əhəmiyyətini vurğulayıb
Ermənistan liderinin sözlərinə görə, layihənin həyata keçirilməsi regionun bütün ölkələrinə fayda gətirəcək.
Paşinyan Ermənistanın çoxqütblülüyün təşviqi yolu ilə suverenliyini möhkəmləndirməyə çalışdığını bildirib. O, bu çərçivədə İran və Gürcüstanla dostluq münasibətlərinin daha da dərinləşdirilməsinin vacibliyini vurğulayıb.
Baş nazir çıxışında müxtəlif güc mərkəzləri ilə münasibətlərin inkişaf etdirilməsinin Ermənistanın xarici siyasət strategiyasının ayrılmaz hissəsi olduğunu da qeyd edib. O bildirib ki, Ermənistan çoxqütblü dünya nizamı ilə bağlı baxışı dəstəkləyir.
Mənbə: trend.az
