Bakının “Neftçi” futbol klubu İsrailin “Makkabi” (Netanya) komandasından Freddi Varqasın transferini rəsmiləşdirib. Bu barədə paytaxt təmsilçisinin mətbuat xidməti məlumat yayıb.
Əldə olunan anlaşmaya əsasən, Venesuela milli komandasının 27 yaşlı ön xətt oyunçusu 2+1 il ərzində “Neftçi”nin formasını geyinəcək.
Varqas 2025-ci ilin yayında “Makkabi”dən satınalma hüququ ilə 1 il müddətinə icarəyə götürülmüşdü. Futbolçu bu müddət ərzində keçirdiyi 34 rəsmi matçda 5 qol vurub və 8 məhsuldar ötürmə müəllifi olub.
Xatırladaq ki, Freddi Varqasın Azərbaycan Premyer Liqasının 30-cu turunda “Karvan-Yevlax”a qarşı keçirilən oyunda (0:3) vurduğu baxımlı qol sosial şəbəkələrdə böyük marağa səbəb olub. Həmin qolun videosu sosial şəbəkələrdə 30 milyondan çox baxış toplayıb.