Çin Tayvan ətrafında gəmilərinin fəaliyyətini əhəmiyyətli dərəcədə artırıb.
“Reuters” agentliyinin məlumatına görə, bu vəziyyət Taybeydə Pekinin adanın blokadası və dəniz təchizat marşrutlarının bağlanması ssenarilərini məşq etdiyi və ya buna hazırlaşdığı ilə bağlı narahatlıqları artırıb.
Tayvan hakimiyyəti iyun ayında Çin sahil mühafizəsi və tədqiqat gəmilərinin 55 dəfə ada ətrafında müşahidə edildiyini açıqlayıb. Bu göstərici may ayı ilə müqayisədə 83 faiz, ötən ilin eyni dövrü ilə müqayisədə isə iki dəfədən çox artım deməkdir.
Rəsmi Taybey hesab edir ki, Pekin sahil mühafizəsi vasitəsilə Tayvana təzyiqi artırır və ərazi iddialarını daha fəal şəkildə irəli sürür. Bildirilir ki, Çin gəmiləri artıq kommersiya gəmiçiliyinin fəaliyyətinə müdaxilə edərək ticarət gəmilərindən limanlara giriş və çıxış barədə məlumat tələb edir.
Tayvanı narahat edən digər məqam isə bəzi Çin sahil mühafizəsi gəmilərinin hərbi gəmilər əsasında yenidən qurulmasıdır. Ada rəhbərliyi hesab edir ki, bu addımlar gələcəkdə mümkün dəniz blokadasına və ya Sakit okeandakı strateji dəniz marşrutlarına çıxışın məhdudlaşdırılmasına hazırlığın tərkib hissəsi ola bilər.
Artan gərginlik fonunda Tayvan yaxın vaxtlarda adanın şərq sahillərində mümkün eskalasiyanı və həyati əhəmiyyət daşıyan dəniz nəqliyyatı marşrutlarının müdafiəsini ssenariləşdirən genişmiqyaslı hərbi təlimlər keçirməyi planlaşdırır.
Çin tərəfi isə hələlik məsələ ilə bağlı rəsmi açıqlama verməyib.