Rusiya ordusu iyulun 8-nə keçən gecə Ukraynanın paytaxtı Kiyevə növbəti raket zərbəsi endirib. Hücum nəticəsində azı iki nəfər xəsarət alıb, şəhərin bir neçə rayonunda yanğınlar baş verib və mülki infrastruktura ziyan dəyib.
Ukraynanın Fövqəladə Hallar üzrə Dövlət Xidmətinin məlumatına görə, raket hücumu nəticəsində Svyatoşın rayonunda inzibati bina və anbar kompleksində güclü yanğın qeydə alınıb. Desnyan rayonunda isə qeyri-yaşayış obyektində yanğın baş verib. Bundan başqa, paytaxtın digər hissəsində bir bina və tramvay zədələnib. Hadisə yerlərində xilasedicilər və yanğınsöndürənlər gecə boyu işləyiblər.
Kiyev meri Vitali Kliçko bildirib ki, yaralılardan biri xəstəxanaya yerləşdirilib. Hücum zamanı şəhərdə hava həyəcanı elan olunub və partlayış səsləri paytaxtın müxtəlif rayonlarında eşidilib.
Ukrayna rəsmilərinin məlumatına əsasən, hücumun nəticələrinin aradan qaldırılması istiqamətində işlər davam edir. Zədələnmiş ərazilərdə dağıntıların həcmi və dəyən maddi ziyanın dəqiq miqyası müəyyənləşdirilir.
