ABŞ administrasiyası, İran tərəfindən artan raket və pilotsuz uçuş aparatı təhlükəsi səbəbindən Yaxın Şərqdəki hərbi strategiyasına yenidən baxır. Bu barədə “The Wall Street Journal” (WSJ) ABŞ rəsmilərinə və peyk görüntülərinin təhlilinə istinadən məlumat yayıb.
Nəşrin məlumatına görə, İranın son zərbələri nəticəsində ABŞ Hərbi Dəniz Qüvvələrinin Bəhreyndəki “Naval Support Activity Bahrain” bazasına rəsmi açıqlanandan daha çox ziyan dəyib. Peyk təsvirləri bazanın komanda mərkəzində, rabitə terminallarında və hərbçilərin yaşadığı kazarmalarda ciddi dağıntıların olduğunu üzə çıxarıb.
Ekspertlərin ilkin hesablamalarına görə, zərər görmüş bazanın bərpası Birləşmiş Ştatlara 386 milyon ilə 400 milyon dollar arasında bir məbləğə başa gələ bilər.
Bu hadisələr fonunda Pentaqon İranın müasir hərbi imkanlarını nəzərə alaraq regiondakı strategiyasında dəyişikliklər hazırlayır. Yeni plana görə, Bəhreyndəki bazanın bərpası ilə yanaşı, komanda məntəqələrinin yeraltı sığınacaqlarda yerləşdirilməsi nəzərdə tutulur.
Bundan başqa, ABŞ-nin Küveyt və Səudiyyə Ərəbistanındakı hərbi kontingentinin və fəaliyyətlərinin qismən azaldılması məsələsi müzakirə edilir. WSJ qeyd edir ki, bu müzakirələrə Səudiyyə Ərəbistanının öz hava məkanından İrana qarşı əməliyyatlar üçün istifadəyə icazə verməməsi də təsir göstərib.
Vaşinqton eyni zamanda bəzi əsas logistika və aviasiya obyektlərini İran raketlərinin birbaşa hədəfi olma riski daha az olan bölgələrə köçürməyi planlaşdırır. Bu çərçivədə İsrail və İordaniyadakı hərbi infrastrukturun rolunun artırılması da nəzərdən keçirilən variantlar arasındadır.