Nauru Respublikası hökuməti İsraildəki səfirliyini Yerusəlimdə açmaq qərarı verib. Bu barədə İsrailin xarici işlər naziri Gideon Saar məlumat verib. Nazirin sözlərinə görə, qərar ötən həftə Naurunun vitse-prezidenti Martin Hunt Aingimea ilə keçirdiyi görüşdən sonra qəbul edilib.
G. Saar bildirib ki, Naurunun diplomatik nümayəndəliyi Yerusəlimdə fəaliyyət göstərəcək onuncu xarici səfirlik olacaq.
Gideon Saar: Nauru İsrailin həqiqi dostudur. Səfirliyin Yerusəlimdə açılması ölkələrimiz arasında münasibətlərin daha da möhkəmlənməsinə və əməkdaşlığın genişlənməsinə mühüm töhfə verəcək.
Hazırda ABŞ, Qvatemala, Honduras, Kosovo, Papua-Yeni Qvineya, Paraqvay və Fici öz səfirliklərini Yerusəlimdə yerləşdirib. Bundan başqa, Kolumbiyanın da yaxın vaxtlarda diplomatik nümayəndəliyini Yerusəlimə köçürəcəyi gözlənilir.
Qeyd edək ki, Nauru Respublikası Sakit okeanın cənub hissəsində, Mikroneziya bölgəsində yerləşən və dünyanın ən kiçik müstəqil ada dövlətlərindən biridir.