ABŞ dövlət katibi Marko Rubio İranın iqtisadi vəziyyəti ilə bağlı açıqlama verib. O bildirib ki, İran zəngin ölkə olsa da, ölkənin iqtisadiyyatı ciddi böhran vəziyyətindədir.
ABŞ rəsmisinin sözlərinə görə, İranda xüsusilə həyati vacib məhsulların qiymətlərində inflyasiya yüksək həddə çatıb. Hökumətin gəlirləri hətta öz əməkdaşlarının maaşlarını ödəmək üçün kifayət etmir. Ölkədə ərzaq çatışmazlığı, quraqlıq və yanacaq qıtlığı kimi problemlər də mövcuddur.
“Bu problemlərin hamısı hadisələr başlamazdan əvvəl də mövcud idi və vəziyyət yalnız daha da pisləşib. Bu proses davam edəcək”.
Dövlət katibi İran rəhbərliyini əldə etdiyi maliyyə resurslarını ölkənin daxili inkişafına deyil, xarici silahlı qruplara yönəltməkdə ittiham edib.
M. Rubionun sözlərinə görə, sanksiyaların yumşaldılmasından və neft satışından əldə edilən gəlirlər də daxil olmaqla, rejimin əldə etdiyi vəsaitlər “Hizbullah”, HƏMAS və İraqdakı silahlı qrupların dəstəklənməsinə xərclənib.
“Onlar milyardlarla dolları öz ölkələrini qurmağa, xalqın rifahını yaxşılaşdırmağa sərf etməli idilər. Lakin bunun əvəzinə həmin vəsaitləri xarici qüvvələri dəstəkləməyə yönəldiblər”.
M. Rubio əlavə edib ki, İran cəmiyyətində bu siyasətlə bağlı artan məlumatlılıq müşahidə olunur. Bununla belə, o, regionda gərginliyin davam etdiyini və hadisələrin necə inkişaf edəcəyini əvvəlcədən deməyin mümkün olmadığını vurğulayıb.