İsrail təhlükəsizlik qurumları vasitəsilə ABŞ-yə Livanın cənubundakı bəzi ərazilərə nəzarətin Livan ordusuna verilməsi ilə bağlı pilot proqramın faktiki olaraq uğursuz olduğunu bildirib.
Jnews.az xəbər verir ki, “The Jerusalem Post” nəşrinin yüksək vəzifəli təhlükəsizlik rəsmilərinə istinadən yaydığı məlumata görə, Livan ordusu İsrail ordusunun təqdim etdiyi koordinatlar üzrə “Hizbullah”ın infrastrukturunu məhv etmir və bununla yanaşı, yeni məlumatlar tələb etməyə davam edir.
Mənbələrin bildirdiyinə görə, hadisələrdən birində Livan hərbçiləri göstərilən əraziyə gəlib, yeraltı obyektə cəmi bir neçə metr daxil olduqdan sonra geri dönərək oranı tərk ediblər.
İsrail rəsmiləri hesab edirlər ki, Livan ordusunun komandanı Rudolf Heykal “Hizbullah”la birbaşa qarşıdurmadan yayınır və təşkilatın silahlarının aşkarlanması, eləcə də hərbi infrastrukturunun məhv edilməsi istiqamətində kifayət qədər addım atmır.
Mənbələrin sözlərinə görə, Livan ordusu ilə “Hizbullah” arasında faktiki olaraq ciddi qarşıdurma və ya təzyiq yoxdur.
Bu səbəbdən İsrail pilot proqramın Livanın cənubundakı digər ərazilərə genişləndirilməsinə hələlik tələsmir.
