Yenilənib: Avqust 25, 2026 10:40 səhər
Rusiya ordusu Ukraynanın Odessa vilayətində Moldova ilə sərhəddə yerləşən “Vınoqradivka–Vulcăneşti” beynəlxalq sərhəd-keçid məntəqəsinə pilotsuz uçuş aparatları ilə zərbə endirib.
Jnews.az xəbər verir ki, hücum avqustun 25-nə keçən gecə baş verib. Moldova Sərhəd Polisi və Ukrayna tərəfinin məlumatına görə, “Şahed” tipli dronun zərbəsi nəticəsində Ukrayna ərazisində yerləşən “Vınoqradivka” sərhəd-keçid məntəqəsinin infrastrukturu zədələnib.
Hadisədən sonra sərhəd-keçid məntəqəsinin fəaliyyəti müvəqqəti dayandırılıb, sərnişin və nəqliyyat vasitələrinin buraxılışı həyata keçirilməyib. Hərəkət digər sərhəd-keçid məntəqələrinə yönləndirilib.
Moldova Sərhəd Polisi hücumun ölkə sərhədi yaxınlığında baş verdiyini, lakin zərbənin Ukrayna ərazisində yerləşən keçid məntəqəsinə endirildiyini bildirib. Hələlik bu hücum nəticəsində ölən və ya yaralananların olması barədə rəsmi məlumat açıqlanmayıb.
Qeyd edək ki, son günlər Moldova-Ukrayna sərhədində bir neçə oxşar hücum qeydə alınıb. Avqustun 21-də də Rusiyanın dron hücumu nəticəsində “Tabakı” sərhəd-keçid məntəqəsi zədələnmiş və fəaliyyəti müvəqqəti dayandırılmışdı.
