İsrail Müdafiə Ordusu (SAXAL) Livanın cənubundakı təhlükəsizlik zonasında həyata keçirilən əməliyyatlar zamanı “Hizbullah” terror təşkilatına məxsus genişmiqyaslı silah-sursat anbarlarının aşkarlanaraq zərərsizləşdirildiyini açıqlayıb.
Hərbi mənbələrin verdiyi məlumata görə, son günlər davam edən əməliyyat-axtarış tədbirləri nəticəsində yaraqlıların gizlətdiyi xüsusi təyinatlı obyektlər aşkar edilib. Bu obyektlərdə çoxsaylı raket buraxılış qurğuları, pulemyotlar, partlayıcı qurğular və müxtəlif növ raket sistemləri ələ keçirilib.
Müəyyən edilib ki, sözügedən silahlar birbaşa İsrail hərbçilərinə və mülki vətəndaşlara qarşı hücumlar planlaşdırmaq üçün hazırlanıb. İsrail əsgərləri tərəfindən həmin anbarlar və içərisindəki bütün silah-sursat yerindəcə məhv edilərək zərərsizləşdirilib.
İsrail Müdafiə Ordusu bəyan edib ki, öz əsgərlərinin və vətəndaşlarının təhlükəsizliyini təhdid edən istənilən amilə qarşı mübarizəni qətiyyətlə davam etdirəcək.
