İsrail Müdafiə Qüvvələri (SAXAL) Livanın cənubundakı təhlükəsizlik zonasında yerləşən Hadata kəndi ərazisində növbəti əməliyyatı uğurla başa çatdıraraq “Hizbullah”ın daha bir dayaq məntəqəsi üzərində əməliyyat nəzarətini ələ keçirdiyini açıqlayıb.
SAXAL-ın mətbuat xidmətinin yaydığı məlumata görə, son bir ay ərzində bölgədə həyata keçirilən əməliyyatlar zamanı “Hizbullah”a məxsus 90-dan çox hərbi obyekt məhv edilib, təşkilatın 20-dən çox silahlısı zərərsizləşdirilib.
Əməliyyatlar çərçivəsində ərazidə qruplaşmaya məxsus geniş silah-sursat anbarı da aşkar olunub. Buradan 150-dən çox silah götürülüb. Aşkarlanan arsenal arasında qumbaraatanlar, tank əleyhinə idarəolunan raketlər, pulemyotlar və AK-47 (“Kalaşnikov”) tipli avtomatlar yer alıb.
İsrail Ordusu bildirib ki, Livanın cənubunda keçirilən əməliyyatların əsas məqsədi sərhəd bölgəsindəki təhlükəsizlik təhdidlərini aradan qaldırmaq, “Hizbullah”ın hərbi infrastrukturunu zəiflətmək və İsrailin şimal yaşayış məntəqələrinin təhlükəsizliyini təmin etməkdir.
Qeyd edək ki, İsrail ordusu son aylarda Livanın cənubunda “Hizbullah”ın mövqelərinə qarşı əməliyyatları intensivləşdirib və sərhəd xətti boyunca qruplaşmanın hərbi potensialının məhdudlaşdırılmasına yönəlmiş tədbirləri davam etdirir.
