Yenilənib: Avqust 20, 2026 4:50 axşam
Rumıniya Hərbi Hava Qüvvələrinin F-16 qırıcısı Qara dənizdə, Konstansa şəhərinin yaxınlığında dəniz pilotsuz uçuş aparatını (PUA) məhv edib.
Rumıniya Müdafiə Nazirliyinin məlumatına görə, hadisə avqustun 20-də ölkənin ərazi sularının yaxınlığında planlı uçuş həyata keçirilərkən baş verib. Naməlum obyekt barədə məlumat kommersiya gəmisindən daxil olub. Bundan sonra Rumıniya Hərbi Hava Qüvvələrinin iki F-16 qırıcısı təcili havaya qaldırılıb.
PUA Rumıniyanın müstəsna iqtisadi zonasında, Neptun Alpha platformasının yaxınlığında, Konstansadan təxminən 80 dəniz mili şərqdə aşkarlanıb. Qırıcıların biri hədəfi ələ keçirərək bort topundan atəş açıb və PUA-nı vurub.
Məhv edilən dəniz PUA-sının partlayıcılarla yükləndiyi bildirilib. Aparatın mənşəyi isə hələlik təsdiqlənməyib. Ukrayna onun özünə məxsus olduğunu təkzib edib.
Hazırda hadisə yerinə Rumıniya Sahil Mühafizəsinin gəmisi və Hərbi Dəniz Qüvvələrinin partlayıcı sursatların zərərsizləşdirilməsi üzrə mütəxəssislərdən ibarət qrup göndərilib. Onlar PUA-nın qalıqlarını və hadisənin digər təfərrüatlarını araşdırırlar.
