İsrail futbol çempionatının ilk turunda Təl-Əviv “Makkabi”si Yerusəlimin “Hapoel”ini 5:2 hesabı ilə məğlub edib.
Jnews.az xəbər verir ki, qarşılaşma Rexovot şəhərindəki yeni stadionda keçirilib.
Qüds təmsilçisi oyunun 37-ci saniyəsində Vitalie Damaşkanın qolu ilə hesabı açıb. Lakin “Makkabi” qısa müddət sonra təşəbbüsü ələ alıb. Roy Revivo 24-cü dəqiqədə hesabı bərabərləşdirib, fasilə ərəfəsində isə Dor Perets penaltini dəqiq yerinə yetirib.
İkinci hissədə Perets daha iki dəfə fərqlənərək karyerasında ilk het-trikini rəsmiləşdirib. “Makkabi”nin digər qolunu isə Sayed Abu-Farxi vurub.
Matçın 76-cı dəqiqəsində “Makkabi”nin qapıçısı Ofek Melika cərimə meydançasından kənarda qayda pozuntusuna görə qırmızı vərəqə alıb. Komanda həmin vaxta qədər bütün əvəzetmə hüquqlarından istifadə etdiyi üçün qapını meydan oyunçusu Sayed Abu-Farxi qoruyub.
Abu-Farxi əlavə olunmuş vaxtda bir qol buraxsa da, son fitdən əvvəl mühüm seyvlə komandasının qələbəsini qoruyub.
Qarşılaşmadan sonra stadionun yaxınlığında azarkeşlər arasında toqquşma baş verib. “Hapoel” klubunun açıqlamasına görə, “Makkabi” azarkeşləri dəyənəklərdən və gözyaşardıcı qazdan istifadə edərək Yerusəlim klubunun tərəfdarlarının avtomobillərinə hücum ediblər. Hadisə nəticəsində bir neçə nəfərin xəsarət aldığı və tibbi yardıma ehtiyac yarandığı bildirilib.
Qüds klubu polisə müraciət edərək insidentdə iştirak edən şəxslərin müəyyənləşdirilməsini tələb edib. “Hapoel” həmçinin “Makkabi” rəhbərliyinin təqsirkar şəxslər barəsində intizam tədbirləri görəcəyinə ümid etdiyini bildirib.
Mənbə: newsru.co.il
