ABŞ Hərbi Dəniz Qüvvələrində hazırda CVN-81 bort nömrəsi ilə tanınan tikilməkdə olan aviadaşıyıcının adının dəyişdirilməsi ilə bağlı daxili müzakirələr aparılır. Mövcud məlumatlara görə, müzakirə olunan variantlardan biri gəmiyə ABŞ-ın hazırkı prezidenti Donald Trampın adının verilməsidir.
İlkin olaraq aviadaşıyıcının Pörl-Harbora hücum zamanı şücaət göstərmiş İkinci Dünya müharibəsi qəhrəmanı Doris Millerin adını daşıyacağı planlaşdırılırdı. Aviadaşıyıcının Donald Trampın şərəfinə adlandırılması barədə qərar qəbul ediləcəyi təqdirdə, bu, misli görünməmiş bir addım olacaq, çünki əvvəllər belə gəmilərə hazırkı prezidentlərin adları verilməyib.
Gəminin adı ilə bağlı müzakirələr cari ilin əvvəlindən davam edir. Hazırda HDQ strukturunda gəmi rəsmi olaraq zavod nömrəsi ilə – CVN-81 kimi qeyd olunur.
Aviadaşıyıcının adının dəyişdirilməsi ehtimalına baxmayaraq, ABŞ HDQ rəhbərliyi Doris Millerin xatirəsini əbədiləşdirmək üçün alternativ variantları nəzərdən keçirir. Xüsusilə, onun adının başqa bir hərbi gəmiyə verilməsi təklif olunur. Bundan əlavə, HDQ Millerin namizədliyinin ABŞ-ın ali hərbi mükafatı olan Şərəf Medalına təqdim edilməsi təşəbbüsü ilə çıxış edib.
Mənbə: oxu.az
