İsrail Müdafiə Ordusu (SAXAL) keçən həftə Qəzza zolağında həyata keçirilmiş dəqiq zərbə nəticəsində HƏMAS hərəkatının iki üzvünün zərərsizləşdirildiyini təsdiqləyib.
Bu barədə SAXAL-ın “Telegram” kanalında yayılan məlumatda bildirilir.
SAXAL-ın məlumatına əsasən, zərərsizləşdirilən şəxslər HƏMAS və “İslam Cihadı” terror təşkilatlarının hərbi qanadlarının üzvləri olan Hüseyn Kadra və Məhəmməd Farrurdur.
HƏMAS-ın maliyyə şəbəkəsindəki rolları
Kadra və Farru, HƏMAS tərəfindən idarə olunan və Qəzza zolağına maliyyə vəsaitlərinin ötürülməsini təmin edən geniş maliyyə şəbəkəsinin bir hissəsi kimi fəaliyyət göstəriblər. SAXAL-ın açıqlamasında qeyd edilir ki, şəbəkəyə rəhbərlik edən Kadra və Farru digər iştirakçılarla birlikdə HƏMAS rəhbərliyinin göstərişi ilə terrorçu qruplaşmanın hərbi qanadının ehtiyacları üçün yarım milyard şekeldən (təxminən 135 milyon dollar) çox vəsaitin köçürülməsinə şərait yaradıblar.
Bu maliyyə vasitələrindən istifadə edərək, HƏMAS son aylarda öz terrorçularına maaş ödəməyə və SAXAL qüvvələrinə, eləcə də İsrail vətəndaşlarına qarşı terror aktlarını maliyyələşdirməyə davam edib.
Ordunun bildirdiyinə görə, bu fəaliyyətlər atəşkəs razılaşmasının pozulması deməkdir.