İordan çayının qərb sahilində yerləşən Haşmonaim nəzarət-buraxılış məntəqəsində İsrail hərbçilərinə qarşı avtomobildən istifadə edilməklə terror hücumu cəhdinin qarşısı alınıb.
İsrail KİV-lərinin məlumatına görə, hadisə zamanı İsrail Ordusunun (SAXAL) hərbçiləri posta sürətlə yaxınlaşan şübhəli avtomobili müşahidə ediblər. Bildirilir ki, sürücü nəqliyyat vasitəsini nəzarət-buraxılış məntəqəsində xidmət aparan əsgərlərin üzərinə sürməyə cəhd edib.
Yaranmış təhlükəyə cavab olaraq hərbçilər xidməti silahlardan istifadə edərək avtomobilə atəş açıblar. İlkin məlumata əsasən, insident nəticəsində İsrail hərbçiləri arasında xəsarət alan olmayıb.
Atəşdən sonra avtomobil hadisə yerindən naməlum istiqamətdə uzaqlaşıb. Hazırda İsrail təhlükəsizlik qüvvələri hücum cəhdində şübhəli bilinən şəxslərin saxlanılması istiqamətində genişmiqyaslı əməliyyat-axtarış tədbirləri həyata keçirir.
Hadisənin başvermə səbəbləri və digər təfərrüatları araşdırılır. Əraziyə əlavə təhlükəsizlik qüvvələri cəlb olunub, nəzarət tədbirləri gücləndirilib.