Ermənistan heç vaxt digər dövlətlərdən qondarma “erməni soyqırımı”nın tanınması ilə bağlı rəsmi müraciət etməyib. Ermənistanın İsraildəki səfiri Arman Hakobyan İsrailin “Kanal 9”-a müsahibəsində bildirib ki, bu məsələ hər bir ölkə üçün vicdan və tarixi ədalət məsələsidir.
İsrail hökumətinin qondarma “erməni soyqırımı”nı tanımaq barədə son qərarını şərh edən diplomat qeyd edib ki, İsrail bu addımı atan 33-cü ölkə olub. Hakobyanın sözlərinə görə, son qərar ikitərəfli münasibətlərdə kəskin dəyişiklik yaratmayacaq. Çünki rəsmi İrəvan bu tanınmanı digər dövlətlərlə əməkdaşlıq üçün əsas şərt hesab etmir.
İsrail və İranla münasibətlər
Ermənistan-İsrail münasibətlərindəki çətinliklərə toxunan səfir 44 günlük İkinci Qarabağ müharibəsi zamanı İsrail istehsalı olan silahların Azərbaycana tədarükünü xatırladıb və bunun erməni cəmiyyətində İsrailə münasibətdə müəyyən iz buraxdığını bildirib. Bununla belə, o vurğulayıb ki, bu səhifəni çevirmək və irəliyə doğru hərəkət etmək lazımdır.
İrəvanın Tehranla münasibətlərindən danışan Hakobyan xatırladıb ki, İran Ermənistanın qonşusudur və dənizə çıxışı olmayan ölkə üçün Fars körfəzinə çıxış baxımından mühüm ticarət və nəqliyyat marşrutlarından biri məhz İran ərazisindən keçir.
Diplomat əlavə edib ki, Ermənistan və İranın siyasi və dini sistemləri tamamilə fərqlidir, onların əməkdaşlığı isə əsasən iqtisadiyyat, energetika və turizm sahələrini əhatə edir.
Yəhudi icmasının vəziyyəti
Arman Hakobyan həmçinin rusdilli KİV-lərdə Ermənistanda antisemitizm problemi ilə bağlı yayılan məlumatları da şərh edib. O, İrəvandakı “Mordexay Navi” sinaqoquna hücum kimi ayrı-ayrı insidentlərin baş verdiyini təkzib etməyib, lakin ölkənin institusional səviyyədə antisemit olduğu barədə iddiaları rədd edib.
Səfir əlavə edib ki, İsrail hökumətinin siyasətinin sərt tənqid olunmasını antisemitizmlə eyniləşdirmək olmaz.
Diplomatın sözlərinə görə, 2022-ci ildən sonra Rusiya, Ukrayna və Belarusdan Ermənistana köçən yəhudilərin hesabına ölkədə yəhudi icmasının fəaliyyəti canlanıb. Yeni təşkilatlar yaradılıb, müxtəlif tədbirlər və Şabbat görüşləri keçirilir. Onun fikrincə, bu faktlar Ermənistanda yəhudi icmasının qorxu içində yaşaması ilə bağlı iddiaları təkzib edir.
Mənbə: 9tv.co.il